РУСКИ КЕРЕСТУР – Од початку октобра у керестурским хотаре нападало вецей як 90 литри по квадратним метеру, цо вецей од нормалного проценту паданьох за тот период, та прето и роботи на полю загамовани.
Ламачка кукурици ище вше актуална, а урожаї ше рушаю од 5,2 до 7 тони по гольту, з уходну влагу од 16,5 по 17 одсто. Терашня цена кукурици коло 16,5 динари зоз 14 одсто влаги, алє понеже дижджи спричинюю векшу влагу, цена будзе нїзша, гваря одкупйоваче. У Керестуре кукурицу одкупюю подприємства „Аґрокерестур”, „Аґрохома”, „Юарбис” и „Житобачка”.
Значне число продуковательох ше опредзелює такой предавац олупану кукурицу, а дзепоєдни ю лаґерую и чекаю лєпшу цену. Як дознава Рутенпрес, кукурицу лаґерую преважно векши продукователє.
У керестурским хотаре дотераз пошати лєм коло 20 одсто з планованих поверхносцох под житом, насампредз пре дижджи хтори падаю од початку октобра. Векшином ше шеє домашнє нашенє дакус помишане з купчим, гваря фаховци.