НОВИ САД – Покраїнска влада на вчерайшей конференциї за медиї сообщела же є процив Предлогу вименкох Закона о польопривредней жеми хтори нєдавно прилапела Влада Сербиї и будзе вимагац його поцагованє з процедури. Вименки спорни бо предвидзую можлївосц предаваня державней жеми и видаванє на 30 роки, цо будзе на чкоду парастом котри нє годни видвоїц вельки пенєж за длугорочну аренду.
Кед терашнї вименки буду прилапени у предложеней форми, Закон цалком вименї и знїщи войводянски и сербски аґрар, гварел предсидатель Покраїнскей влади Боян Пайтич. Визначел же Покраїнска влада до Скупштини Войводини пошлє предкладанє амандманох, а потим их покраїнски парламент прешлїдзи до Народней скупштини. У случаю же терашнї Предлог нє будзе поцагнути зоз скупштинскей процедури, Пайтич наявел же повола гражданох на протест процив його прилапйованя.
Предложени вименки даваю першенство браня державней жеми под аренду на 30 роки, цо значи же ше ю будзе давац правним лїцом, односно тайкуном, а виключує ше можлївосц же би тоту жем под аренду брали индивидуални польопривреднїки, гварел вчера Пайтич на конференциї за медиї, на хторей присуствовали и седмеро члени Покраїнскей влади.
Покраїнски секретар за польопривреду, водопривреду и лєсарство Бранислав Боґарошки прецизовал же ше, на основи Предлогу, 30 одсто державней жеми у каждей локалней самоуправи будзе давац на 30 роки и то єдней правней особи, на основи директней догварки з комисию Министерства польопривреди. З тей нагоди винєсол податок же тераз 80 одсто дежавней жеми обрабяю индивидуални польопривреднїки, а з вименками Закона ”їм ше вибиє з рукох найлєпшу часц державней жеми”.
Додал же у Покраїни єст коло 450 000 гектари державней жеми, дзе коло 320 000 гектари обрабяца жем. Як гварел, то би значело же би коло 150 000 гектари було дате на длугорочну аренду домашнїм тайкуном, лєбо странским инвеститором.
