НОВИ САД – З чечуцей буджетней резерви Покраїнска влада опредзелєла 1,8 милиони динари за фамелиї жертвох траґедиї у Општини Житиште, хтора ше збула вноци медзи 1. и 2. юлийом, одлучене на вчерайшей схадзки Покраїнскей влади.
Принєшени и ришеня о утаргованю ришеньох о хаснованю средствох з чечуцей буджетней резерви, та дзепоєдни секретарияти до нєй врацели пенєж, вєдно 52 милиони 869 000 динари. Як сообщела Покраїнска влада, ришеня утаргнути прето же по конєц 2016. року нє годно витвориц шицки активносци хтори нєобходни за предмети финансованя, алє и прето же Покраїна утвердзела нови приоритети финансованя з буджетней резерви, насампредз у здравстве.
На вчерайшей схадзки Покраїнска влада дипломованого инженєра будовательства Славка Врнджича меновала за окончователя длужносци директора Явного водопривредного подприємства „Води Войводини“.