НОВИ САД – Пре економични и практични причини, републични, покраїнски и локални виберанки буду отримани нараз, порадзели ше предсидателька Народней скупштини Сербиї Мая Ґойкович и предсидатель Скупштини Войводини Иштван Пастор. Пастор гварел же покраїнски виберанки буду розписани 22. марца, та по предписаньох – виберанки би мали буц од 22. априла по 22. май.
– Покраїнски виберанки муша буц розписани 90 днї пред законченьом мандату, а то 22. марец. Виберанки можу буц найскорей 30 днї, а найпознєйше 60 днї од розписованя виберанкох – гварел Пастор новинаром после розгварки з Маю Ґойкович.
Предсидателька Народней скупштини Републики Сербиї наглашела же за розписованє локалних виберанкох, по предписаньох, муши причекац ище даскельо днї, понеже виберанки нє буду у 14 општинох, та треба розпатриц дзе виберанки буду отримани, а дзе нє.
Ґойковичова гварела же виберанки за локални самоуправи розпише после викенду, а пре економичносц и практичносц – и тоти виберанки буду заказани за исти дзень кеди и републични и покраїнски.