СЕРБИЯ – Улога преси у витворйованю интересу гражданох бул циль виглєдованя першого Кварталного медияметра, у хторим анализовани дньово новини „Блиц“, “Политика“, “Вечернє новости“, “Данас“, “Курир“, “Информер“ и „Ало“, та тижньовнїки „Време“, „НИН“ “Печат“ “Нови маґазин“ и “Недельник“. Резултати анализох указали же политика доминантна тема новинох у Сербиї.
Виглєдованє указало же од дньових новинох найбалансованши приступ у пласованю змистох ма “Данас“, док “Ало“ идзе до другей крайносци та його теми прицагую повагу, алє су найменєй у складзе зоз принципами професионалносци. Медзитим, шицким новином заєднїцке же политични живот у Сербиї найзначнєйша тема, потим привреда, та активносци Влади Сербиї, а указало ше же Александар Вучич найчастейше бул на насловних бокох анализованих новинох.
Єден зоз виглєдовачох, Деян Вук Станкович, вчера на представяню резултатох гварел же ше указало же у друкованих медийох нєт цензури, а же ше о имиджу власци и премиєра найвецей пише у коментарох у анализованих тижньовнїкох и то праве на тему диктатури и цензури.
Заєднїцке за пейц анализовани тижньовнїки то же анї єден текст нє представел Владу у позитивним смислу, а розликую ше по одношеню ґу вонкашнєй политики. „НИН“ и “Време“ проевропски ориєнтовани и критицки ґу политики Влади и премиєра, док “Нови маґазин“ тиж проевропски и умерено критицки. “Печат“ радикално евроскептични и прорусийкей ориєнтациї, а “Недельник“ умерено евроскептични и умерено прорусийски, указали анализи.
Анализу друкованих медийох у Сербиї за перши штири мешаци 2015. року окончели Институт за явну политику, Медийна архива ЕБАРТ и фаховци котри провадза медиї, а по конєц рока буду окончени ище три.