НОВИ САД/БЕОҐРАД – Польопривреднїки з Войводини вчера рушели до протестного воженя на тракторох до Беоґраду, алє их у велїх местох застановела полиция, та парасти з тракторами од рана були блокировани на драгох коло Змаєва, Новей Црнї, Сут’єски, Кикинди, Воґню и на других напрямох, дзе и ноцовали. Полиция блокировала и драгу Зренянин-Беоґрад, при Ченти, а протест орґанизує Асоцияция польопривреднїкох и ище коло 10 здруженя польопривреднїкох з Войводини и Мачви.
Польопривреднїки з протестним воженьом виражую нєзадовольство з предложенима вименками Закона о польопривредней жеми.
Вчера ше зоз сообщеньом оглашело и Министерство польопривреди и защити животного штредку, у хторим ше гвари же Министерство и Влада Сербиї отворени за розгварки и сотруднїцтво на унапредзеню постояцого Нарису Закона о вименкох и дополнєньох Закона о польопривредней жеми.
У сообщеню ше додадава и же „радикализованє становискох и подполна виключуюцосц” нє доприноша ришеню.
Протест парастох потримує и Лиґа социялдемократох Войводини (ЛСВ) и вчера вечар Бета пренєсла же ЛСВ нєшка на „пейц до 12” орґанизує протестне воженє тракторох опрез Скупштини Сербиї, понеже Министерство нукашнїх дїлох дошлєбодзело „одредзеному числу тракторох” войсц до Беоґраду и присц по Скупштину, же би парасти придали вимогу за поцагованє спомнутого Закона – дознава Бета у ЛСВ.