БЕОҐРАД – Парасти з Нєзависней асоцияциї польопривреднїкох Сербиї (НАПС), котри протестую процив Предлогу о вименкох Закона о польопривредней жеми, вчера ше на тракторох привезли пред будинок Скупштини Сербиї и придали свойо вимоги одвичательним особом.
Предсидатель Управного одбору НАПС Йовица Якшич за Бету гварел же тото здруженє процив Предлогу хтори предвидзує же би ше польопривредним ґаздовством хтори маю до 30 гектари жеми оможлївело купованє до 20 гектари державней жеми.
Як сообщело Министерство польопривреди, парасти мали схадзку и з ресорну министерку Снежану Боґосавлєвич Бошкович, на хторей винєсли конструктивни предкладаня. Обидва боки ше зложели же Предлог о вименкох Закона о польопривредней жеми ма квалитетни ришеня, алє єст и часци о хторих треба прегваряц.
Медзитим, нєзадовольни польопривреднїки, насампредз у Банату, з тракторами и далєй на драгох, а свойо становиска вимагаю потолковац предсидательови Влади Александрови Вучичови.
Прешлого тижня, 26. новембра, представителє часци парастох котри протестую, у орґанизациї Лиґи социялдемократох Войводини до Скупштини Сербиї придали вимогу за поцагованє спомнутого предлогу зоз скупштинскей процедури.