Породзилїща нє сполнюю обчекованя положнїцох

автор сен
861 Опатрене

БЕОҐРАД – Породзилїща у Сербиї занєдзбани и нєдостаточно ше до нїх уклада, цо приведло до нєвигодних условийох и нєдостаточного числа занятих. То окреме обачиц у менших городох и општинох – указало виглєдованє „Яки нам породзилїща?“ хторе окончел портал „Бебац“.

Авторка виглєдованя Ясмина Михняк гварела же 9 888 мацери котри участвовали у виглєдованю породзилїщом у Сербиї дали штредню оцену 3,54.

– Найслабше, з оцену 2,95, мацери оценюю пребуванє у породзилїщу, а нєзадовольни су зоз станом у хижох, єдзеньом, нєприємносцу занятих и слабим информованьом о дойченю – гварел Михнякова.

Високи оцени достали лїкаре и бабици, а положнїци задовольни зоз швидкосцу приявйованя и одношеньом занятих у салох за полог. Задовольство женох у вельких породзилїщох ше розликує од задовольства у малих и штреднїх. Указало ше же мали породзилїща нє маю одвитуюци условия, як цо то сала за царски рез, а вельким хиба же там пребува вельке число женох, та нє можу достац потребну повагу.

Анкетовани положнїци оценєли же найлєпше мале породзилїще у 2016. року породзилїще у Сенти. Спомедзи штреднїх породзилїщох як найлєпше оценєте породзилїще у рамикох Клїнїчно-шпитального центру „Др Драґиша Мишович“ на Дединю у Беоґрадзе, а як найлєпше вельке породзилїще „Бетания“ у Новим Садзе.

ПОВЯЗАНИ ТЕКСТИ