НОВИ САД/БЕОҐРАД – Гоч су найчисленша меншинска заєднїца у Европи, Роми ище вше дискриминовани и марґинализовани, сообщел Покраїнски омбудсман з нагоди 8. априла – Шветового дня Ромох.
На основи ратификованих медзинародних документох з обласци людских и меншинских правох, та у рамикох Декади Ромох, Сербия превжала числени обовязки унапредзиц и защициц права припаднїкох тей меншини.
У предходней децениї Сербия напредовала у обласци учасци Ромох у явним и политичним живоце, орґанох вивершней власци, а єст вше вецей високошколованих припаднїкох Ромох обидвох полох.
Поверенїца за защиту ровноправносци Бранкица Янкович виявела же Шветови дзень Ромох нє шме мац лєм символичне значенє, алє є и добра нагода спозориц на барз чежке држтвене и економске положенє тей националней меншини.
Поверенїца гварела же ше окреме треба застарац пре одношенє дзепоєдних представительох орґанох явней власци ґу Ромом, понеже ше вони поносую же їх дискриминую праве гевти на чию потримовку маю раховац.
– Нєобходна пременка одношеня дружтва и преберанє одвитуюцих мирох, а перше треба цалком уключиц шицки ромски дзеци до образовней системи, цо Ромом и Ромкиньом обезпечи ровноправни и достоїнствени живот – поручела Янковичова.