РУСКИ КЕРЕСТУР – Вивершни одбор (ВО) Совиту Месней заєднїци (МЗ) Руски Керестур вчера бешедовал о способе помоци власнїкови згореней хижи у Фрушкогорскей улїци ч. 100 у Руским Керестуре, хтора згорела у барз вельким огню вноци 26. мая. После того нєщесца хижу ше валя, понеже ю нє мож оспособиц за дальше биванє.
На ВО Совиту МЗ одлучене же од пондзелку идуцого тижня, 20. юния, два младши особи овласцени од Месней заєднїци почню нащивйовац шицки керестурски обисца и гражданє, кажде у своїх моцох, тим особом годни дац пенєжну помоц. За тото дарователє достаню квиту, а назберани пенєж МЗ уплаци на рахунок очкодованого власнїка.
Тиж так, уж од нєшка шицки заинтересовани людзе добрей дзеки, нє лєм з Керестура, свой добродзечни прилог можу уплациц на наменски рахунок власнїка Янка Пастернака: 200-64285343-72 у Поштанскей шпоровнї (Poštanska štedionica a.d. Beograd). Таки способ помоци будзе витворени у догварки МЗ з власнїком згореней хижи.
Вивершни одбор МЗ поволує Керестурцох и шицких людзох добрей дзеки же би участвовали у тей гуманитарней акциї.
