Потвердзени програми тогорочней „Червеней ружи“

автор сен
1.2k Опатрене

РУСКИ КЕРЕСТУР – Програмски одбор 55. Фестивалу рускей култури „Червена ружа“ вчера потвердзел програми и термини манифестацийох хтори буду отримани 1. и 2. октобра у рамикох того Фестивалу.

Фестивал „Червена ружа“ почнє на соботу, 1. октобра, на 16 годзин кеди у голу Спортскей гали будзе отворена вистава авторки Андєлки Античевич зоз Беркасова, а на 16,30 годзин почнє музично-танєчна манифестация „Червене пупче“. На „Пупчу“ буду виведзени 10 нови композициї за дзеци и коло 10 точки хтори виведу дзецински ансамбли з наших местох. Як и звичайно, после програми за дзеци будзе орґанизовани диско.

Истого вечара, после рокох паузи, публика годна ознова уживац у „Одгукох ровнїни“, на хторих свойо активносци през рок годни представиц културно-уметнїцки, културно-просвитни дружтва и доми култури, а наступ того року наявел и музични ансамбл зоз Попраду зоз Словацкей.

Нєдзельова програма почнє на 18 годзин зоз змагательну часцу у хторей ше за кошарку червених ружох и дзивоцку ладу буду змагац 10 дзивки, а за чобольов троме леґинє. У ревиялней часци будзе отримани мини-концерт на хторим буду виведзени композициї зоз компакт диску „Лєм єден погляд“ Златка Русковския, а на концу, на 20 годзин почнє Шветочни концерт, на хторим традицийно наступаю найквалитетнєйши ансамбли.

2-odbor 2

ПОВЯЗАНИ ТЕКСТИ