СЕРБИЯ – На ютре, 15. фебруара, Медзинародни дзень дзецох котри охорели од малиґних хоротох и з тей нагоди ше тих дньох отримує и рижни гуманитарни акциї.
У Сербиї кажди рок од малиґних хоротох охоря коло 320 дзеци и млади до 19 роки, спомедзи котрих 56 умру, гварене на конференциї хтора отримана штварток, 12. фебруара.
Податки о терашнїм стану охорених дзецох представела др Снежана Живкович Перишич, епидемиолоґ з Институту за явне здравє Сербиї „Др Милан Йованович Батут“, котра гварела же морталитет у Европи, та и у Сербиї, менши у одношеню на период пред 30 роками, алє ище вше барз вельо дзеци умераю од малиґних хоротох. О тим шведочи податок же у швеце рочнє охоря коло 160 000 дзеци, а з нїх коло 90 000 умре.
На конференциї бешедоване и о унапредзованю квалитету живота охорених дзецох од малиґних хоротох, та визначене и же потребне анґажовац психолоґох котри би помагали дзецом, алє и їх фамелийом же би ше лєгчейше зочели з хороту.