МУЧОНЬ/НОВИ САД – Пияток, 2. децембра, на грекокатолїцким теметове у Мучоню, у Мадярскей, поховани наш визначни културно-просвитни роботнїк, виглєдовач историї Руснацох, публициста и писатель Мирон Жирош, котри жил у Казонбарцики у Мадярскей, а умар 29. новембра (1936-2016).
Попри його найблїзшей фамелиї, Мирона Жироша на його остатню драгу випровадзели числени грекокатолїки з Мучоню и околїска, а обряд хованя предводзели троме грекокатолїцки священїки з Казинбарцики и Мучоню, як и син Мирона Жироша о. Мирослав Жирош, котри як православни священїк службує у України.
На хованю Мирона Жироша у Мучоню у мено Националного совиту Руснацох були заменїк предсидателя Совиту Йовґен Мудри и Маринко Дудаш з Дюрдьова, а велї нашо установи, институциї и здруженя Жирошовей фамелиї послали телеграми сочувствия.
На пияток, 9. децембра, у просторийох Заводу за културу войводянских Руснацох у Новим Садзе будзе комеморативни сход пошвецени Миронови Жирошови, а о його дїялносци и творчим доприносу нашей култури и лєпшому упознаваню нашей историйней прешлосци буду бешедовац проф. др Янко Рамач, публицисти Дюра Латяк, редактор часопису „Шветлосц” Микола М. Цап и редактор Видавательного оддзелєня „Руского слова” Микола Шанта.
Сход на пияток будзе на 12 годзин, а з нїм источашнє будзе означена и 80-рочнїца народзеня Мирона Жироша.