БЕОҐРАД – Национална алиянса за локални економски розвой (НАЛЕД) оценєла же Нарис закона о финансованю локалней самоуправи треба поцагнуц з процедури, бо спричинї финансийне слабенє городох и општинох.
НАЛЕД предклада же би ше окончело дополнююци анализи и проєкциї рушаня приходох на локалу и ефектох применьованя закона.
Тота орґанизация наводзи же направела симулацию на прикладзе буджету городу зоз 100 000 жительох, хтора указала же би утрати на приходним боку були вецей як милиярду динари.
З алиянси оценєли и же городом и општином у Сербиї рошню компетенциї, зменшує ше приходи, а нови обовязки их чекаю на драги пруступаня ґу ЕУ.
Як приклад НАЛЕД наводзи же на локални самоуправи преруцена старосц о примарней здравственей защити, медзитим, понеже нє достали додатни средства, нєотримуюца система финансованя приведла до росту длуства здравствених установох на локалу на 10 милиярди динари, хтори виплаца гражданє.
НАЛЕД надпомина и же општини „уж прецерпели вдеренє на буджети” пре зменшанє порциї на заробки з 12 на 10 одсто и спозорел же, кед им держава предлужи зменшовац приходи и звекшовац обовязки, локални самоуправи примуши на звекшованє таксох и надополнєньох.
НАЛЕД предложел Влади Сербиї же би бешедовала з двома найвекшима репрезентативнима здруженями локалних самоуправох, же би ше защицело интереси гражданох и привреднїкох.