КОЦУР – З приходом учашнїкох вчера пополадню, у Коцуре почала 6. Акция младих „Дай и ти свою руку”, у орґанизациї Коцурского здруженя младих (КУМ). Акция урядово отворена на вечаршей програми у Доме култури.
Програму отворел предсидатель КУМ-у Стеван Самочета, а учашнїкох Акциї привитал и предсидатель Општини Вербас Милан Ґлушац.
Општина Вербас ґенерални спонзор Акциї, финансийно ю потримує и Роботне цело за младеж Националного совиту Руснацох, як и спонзоре.
Попри Ґлушца, на отвераню були и помоцнїк предсидателя Општини Вербас Ксения Бенце, предсидатель Совиту Месней заєднїци Коцур Желько Бєлан и други госци.
Пригодну програму отвераня Акциї „Дай и ти свою руку”, на хторей виведзени вецей рецитаторски и музични точки, водзели Иґор Пушкаш и Кристина Ковачевич, котри и участвовали у програми, як и музичаре Михаил Рамач и Саня Дивлякович.
Пред програму отворена вистава младих маляркох и учашнїцох на Акциї – Александри Самочета и Єлени Симонович.
По отвераню учашнїки мали заєднїцку вечеру, а потим орґанизовани концерт бендох „Бесне ґлисте” и „Блоу” з Вербасу.
Нєшка дополадня будзе роботна часц, а пополадню креативни роботнї, спортски змаганя и вирска програма.