Почала жатва ярцу, цена ище нє позната

автор сас/зам/тах; фото: тах/сас
969 Опатрене

ДЮРДЬОВ/РУСКИ КЕРЕСТУР/КОЦУР – У дюрдьовским хотаре ище прешлей соботи почала косидба ярцу, но була претаргнута пре дижджи, та є предлужена штварток того тижня. У рускокерестурским хотаре жатва ярцу почала вчера, а тих дньох и у коцурским.

Перши урожаї у Дюрдьове указую же ярец того року добре зродзел, та спрам словох парастох, начурело медзи штири и пейц тони по гольту. Статкови ярец Дюрдьовчанє предаваю подприємству „Униокоп” у Жаблю, хторе ище нє обявело одкупну цену.

Керестурске подприємство „Юарбис” под ярцом ма законтрачени 26 гектари, за тераз ище нє могли бешедовац о урожаю, алє познате же косидба ярцу почала з його одвитуюцу влагу, од коло 13,5 одсто.

Попри „Юарбису”, ярец у Керестуре одкупюю и подприємства „Аґрохома” и „Аґрокерестур”, а цена тогорочного роду ище нє позната. Як нагадую зоз спомнутих подприємствох, кед будзе красна хвиля, косидба ярцу будзе закончена того викенду.

И у коцурским хотаре почала жатва пивского и статкового ярцу, а одкуп почнє пошвидко. И ту цена ище вше нє позната, а влага зарна дацо вецей як 12 одсто.

Статкови ярец у Коцуре годно предац на двох местох – у Роботней єдинки подприємства „Либела продукт” зоз Змаєва и у маґазинє подприємства „Фарм Кооп” (на призми), док пивски ярец одкупює Землєдїлска задруґа „Класка”.

ПОВЯЗАНИ ТЕКСТИ