КОЦУР – Вчера почали роботи на оправяню лєтнєй бини на коцурским пияцу, коло Дому култури‚ а єдну часц трошкох виплаца млади з коцурского Здруженя „КУМ”, з пенєжу хтори достали по проєкту.
За реконструкцию цалей бини потребни милион и пол динари‚ а Здруженє „КУМ” од Фондациї „Траґ” з Беоґраду достало 328 000 динари, на основи проєкту „Ушорюєм тото цо ми завадза, пре красши Коцур и швет”.
З того пенєжу млади з „КУМ” буду финансовац оправянє найочкодованшей часци бини, а другу часц пенєжу планую вихасновац за орґанизованє єдней роботнї и правенє атлетскей дражки на коцурским беґлю.
Перша фаза реконструкциї бини мала би буц закончена по 24. юлий‚ по початок Акциї „Дай и ти свою руку”, хтору орґанизує спомнуте здруженє. Виводзаче роботи гварели же за терашнї плановани роботи досц три днї, так же можебуц буду закончени уж на ютре.