БЕОҐРАД – Як преноши сайт Радио-телевизиї Войводини, почала явна розправа о Нарису стратеґиї розвою системи явного информованя у Сербиї, а по 1. марец, покля ма тирвац, буду орґанизовани и штири округли столи.
Текст Нарису медийскей стратеґиї и шицки информациї у вязи зоз отримованьом явней розправи доступни на сайту Влади Републики Сербиї, и на порталу е-Управи. Явну розправу о Нарису медийскей стратеґиї водзи Кабинет предсидательки Влади.
Зауваги, предкладаня и суґестиї у вязи зоз Нарисом стратеґиї дава ше Кабинету по 1. марец того року на имейл адресу medijska.strategija@gov.rs, лєбо на адресу Неманїна 11, Беоґрад (зоз назначеньом „Нарис стратеґиї розвою системи явного информованя у Републики Сербиї”).
У рамикох явней розправи будзу орґанизовани штири округли столи и то 19. фебруара у Новим Садзе, 22. фебруара у Нишу, 25.фебруара у Чачку и 27. фебруара у Беоґрадзе. У явней розправи и на округлих столох буду участвовац представнїки медийских и новинарских здруженьох котри творели Роботну ґрупу за вибудов медийней стратеґиї, наводзи ше у сообщеню Канцелариї Влади Сербиї за сотруднїцтво зоз медиями. То догварене на нєдавней схадзки предсидательки Влади Ани Брнабич зоз членами тей роботней ґрупи.
Попри членох Роботней ґрупи у вибудови Медийскей стратеґиї участвовало и вельке число експертох, представнїкох медзинародних орґанизацийох и орґанизацийох цивилного дружтва, медийох, явних сервисох, академскей явносци и други. По законченю явней розправи, Кабинет предсидательки Влади будзе анализовац шицки суґестиї, предлоги и зауваги учашнїкох явней розправи и направи звит о явней розправи.