Почали Днї Миколи М. Кочиша

автор опс  фото вев
1k Опатрене

НОВИ САД – У рамикох Манифестациї Днї Миколи М. Кочиша вчера, 1. децембра, у Ґалериї Дружтва писательох Войводини у Новим Садзе отворена пията самостойна вистава подобових роботох у технїки енкаустика авторки Сонї Папуґа Андєлич, з назву „Шлїди”.

Виставу спред орґанизатора Дньох Миколи М. Кочиша – Дружтва за руски язик, литературу и културу – отворела Ирина Папуґа, представела Соню Папуґа Андєлич як авторку, а спред домашнього Дружтва писательох Войводини присутних привитал Миомир Илич. Кратшу биоґрафию авторки винєсла мр Гелена Медєши, а о технїки енкаустики (з розтопеним воском, походзеньом ище зоз старого Єгипту и досц  компликованей), бешедовала предсидателька Здруженя подобових уметнїкох ЛИКУМ з Нового Саду Любица Амиджич.

Ирина Папуґа визначела же Соня Папуґа Андєлич того року участвовала на Подобовек колониї „Стретнуце у Боднарова”, а окрем подобовей уметносци, пише и поезию. Гелена Медєши гварела же Соня свойо роботи викладала у Данскей, єй найзначнєйша вистава була у Амбасади Републики Сербиї у Копенхаґену, а поведзене же ше занїма з гуманитарну роботу.

Вистава будзе отворена два тижнї, а Дружтво за руски язик, литературу и културу за виставу видало и окремни каталоґ. На отвераню єдну писню Сонї Папуґа Андєлич пречитала Таня Вечкалов.

Днї Миколи М. Кочиша почали вчера на поладнє, кед представителє Дружтва за руски язик, литературу и културу на Городским теметове у Новим Садзе положели квеце на гроби Миколи М. Кочиша,Меланиї Павлович и Яшу Бакова.

ПОВЯЗАНИ ТЕКСТИ