НОВИ САД – З вибором шпивачох и розписованьом аранжманох за шпиванки, тих дньох предлужени пририхтованя за тогорочни Фестивал „Ружова заградка”. На конкурс за нови руски шпиванки у народним духу Явней медийней установи Войводини „Радио-телевизиї Войводини” сцигли роботи 33-ох авторох, а за Фестивал вибрани 16 композициї.
Як за Рутенпрес виявела музична редакторка Фестивалу Агнета Тимко Мудри, медзи вибранима авторами шпиванкох єст и нових, як и тих котри поряднє участвую на Фестивалє, а композициї буду интерпретовац шпиваче з уж познатей младшей ґенерациї, дзе тиж будзе и ошвиженя. Того року буду доминовац солисти, а ревиялна часц пошвецена Юлиянов Рамачови Чамови.
Оркестер, з хторим руководзи Мича Янкович, з пробами почнє 8. фебруара, а 18. фебруара плановане знїманє матрицох.
Тогорочни Фестивал „Ружова заградка” будзе отримани у своїм звичайним терминє – першу нєдзелю у марцу, а того року то 6. марец.