НОВИ САД – Дружтво за руски язик, литературу и културу и на початку другого полрочя школского 2018/2019. року предлужує зоз своїма активносцами.
Дружтво до руских дзецинских заградкох, школох и на факултет послало поволанку за участвованє на Литературно-подобовим конкурсу пошвеценому творчосци Миколи М. Кочиша, а термин за посиланє роботох 15. фебруар. Попри тим, до руских школох и наставнїком руского язика хтори орґанизую порядну и виборну наставу зоз школярами од V по VIII класу послати Календар змаганя Mинистерства просвити за 2018/2019. школски рок зоз прияву за Медзиокружне змаганє з руского язика и язичней култури, хторе будзе отримане 6. априла у Основней школи „Братство єдинство у Коцуре, а термин за посиланє приявох 20. марец.
И у другим полрочю буду отримовани годзини руского язика за школярох штреднїх школох у „Бранковим колу“ у Новим Садзе, пондзелками, од 20-21 годзин.
Воспитно-образовни активносци по руски у „Палчочки“, тиж у Новим Садзе, зоз предшколскима дзецми почню на стреду, 23. януара, на 18 годзин.
Дружтвo за руски язик, литературу и културу, на чесц Дня Руснацох, видало два нови наслови – Зборнїк роботох „Studia Ruthenica” 23 и Подобови каталоґ „Стретнуце у Боднарова“ XIV зоз виставу у Ґосподїнцох.