РУСКИ КЕРЕСТУР – У Катедралней церкви св. оца Миколая у Руским Керестуре початком тижня почали плановани роботи на турнї и у олтаре.
Вчера почало дзвиганє скели по турню, на хторей буду заменєни малтер и фасада. Пондзелок почало малтерованє у олтарскей часци церкви, дзе маю буц поставени реставровани стари образи дванац апостолох.
З роботами на турнї будзе предлужене елиминованє влаги у Катедралней церкви, цо почало прешлого року, кед даскельо метери до висока обити вонкашнї мури.
За роботи на турнї 400 000 динари обезпечени з Канцелариї за одношеня з церквами и вирскима заєднїцами при Министерстве правди, як и од донацийох парохиянох. Понад 100 фамелиї того року даровали коло 90 000 динари, а прешлого року коло 100 000 динари, з хторих єдна часц уж потрошена за оправянє церкви.
Роботи у олтаре буду финансовани з донациї анонимней даровательки, котра за тоту намену зохабела два гольти жеми.
Пре спомнути роботи, ранши Служби Божо на 7, и вечарши (од вчера на 18 годзин), до конца тижня буду у каплїци шестрох служебнїцох на Капущаним шоре.