РУСКИ КЕРЕСТУР – Од конца прешлого тижня, спортисти и рекреативци у Руским Керестуре тренинґи можу отримовац у спортско-школскей гали, понеже на општинским уровню дата согласносц же би ше ю почало хасновац.
Гала урядово отворена у авґусту прешлого року, а дотераз нє було допущене єй хаснованє, понеже нє ришене питанє учасци инвеститорох у власнїцтве. Як гварел предсидатель Совиту Месней заєднїци Руски Керестур Владимир Олеяр, процес дзелєня медзи инвеститорами – же цо кому припада – станул на покраїнским уровню, и ище вше є нє ришени.
Перши тренинґ, пияток, 21. авґуста, отримали рукометаше Спортского дружтва (СД) „Русин“, а як гварели у Месней заєднїци – гала отворена за шицких. За отримованє гали задлужени Месна заєднїца и СД „Русин“, а за орґанизацию и розпорядок тренинґох задлужени предсидатель СД „Русин“ Драґан Ковачевич, котрому ше треба явиц за трениранє у гали.
Гоч спортисти конєчно достали простор за трениранє и у завартим, на жиму будзе проблем зоз зогриваньом, понеже є направене на ґаз, хтори, гоч инсталация поставена по цалим валалє, до Керестура ище вше нє пущени.
Скоро дзешецрочне будованє спортско-школскей гали финансовала Покраїна прейґ Фонду за капитални укладаня Войводини зоз 147 милиони динари, коло 23 милиони обезпечени з месного самодоприносу и коло 4 милиони з Општини Кула.
