НОВИ САД – Того тижня почало витворйованє проєкту Новинарскей асоцияциї Руснацох (НАР) „Приклади добрей пракси – драгоказ розуменя, хтори потримали Покраїнски секретерият за медзиреґионалне сотруднїцтво и локалну самоуправу и Канцелария ТАКСО.
Стреду, 7. октобра, Радио Оджак емитовал першу зоз седем емисийох у рамикох того проєкту, а емисиї поробени у седем општинох – у спомнутей оджацкей, та у општинох (городох) Суботица, Нови Бечей, Кула, Зренянин, Беочин и Кикинда.
Авторе емисийох, односно проєктни тим членох НАР-у витворели седем петнацминутово емисиї по сербски, а проєктни тим творели його координаторка Анамария Ранкович, та Александра Живкович, Саня Маркович, Ана Маркович, Мария Перкович и Михаил Рамач.
Емисиї буду емитовани у спомнутих локалних радио-станїцох, а у рамикох проєкту будзе отримана и схадзка представительох локалних електронских медийох хтори участвую у проєкту, дзе будзе слова о можлївосцох дальшого сотруднїцтва.
Проєкт НАР-у „Приклади добрей пракси – драгоказ розуменя” будзе закончени 22. октобра того року.