КУЛА – У кулскей општини того тижня почало ушорйованє беґельскей мрежи пре лєпше одводньованє польопривредней жеми. Роботи почали у кулским хотаре, а потим буду предлужени и на беґельох у других, медзи нїма и у керестурским хотаре.
Чежиско роботи дате и на ушоренє нїзших теренох коло населєних местох, дзе баржей грожа поджемни и атмосферски води, а плановане ушориц прейґ 52 километри.
Роботи окончує Водопривредне подприємство „Бачка” з Вербасу, їх цалосна вредносц скоро 18 милиони динари и финансую их Општина Кула и Покраїнски секретарият за польопривреду, водопривреду и лєсарство. Општина Кула за тоту намену опредзелєла 8 милиони динари, зоз средствох з даваня державней жеми под аренду, а другу часц Секретарият.