НОВИ САД – Вчера вечар у Руским културним центре (РКЦ) у Новим Садзе почал 14. Руски фестивал малих сценских формох „Дюра Папгаргаї”, хтори орґанизує Матка-Дружтво Руснацох Нового Саду-Войводини, Городски одбор Рускей матки Нового Саду и новосадски РКЦ.
У мено орґанизаторох присутних привитали Владимир Гаргаї и Нада Загорянски, а Фестивал урядово отворела Саня Тиркайло, предсидатель Реґионалного одбору Рускей матки за Срим зоз Шиду, котра понєйше, як його директорка, представела и тогорочни перши Руски филмски фестивал „Русин Филм Фест” у Шидзе.
Медзи другима госцами, на отвераню Фестивалу и його вчерайших змистох були и предсидатель Рускей матки Дюра Папуґа, началнїк Општинскей управи Шид Ромко Папуґа, новосадски парох о. Юлиня Рац, писателька и супруга Дюру Папгаргая Агнета Папгаргаї, писателька Ирина Гарди Ковачевич и други.
Перши дзень Фестивалу бул пошвецени и Миркови Ґаднянскови, нашому вчас упокоєному шпивачови, ґлумцови, школованому режисерови и новинарови, а прейґ представяня його животней и роботней биоґрафиї и творчосци (и прейґ видео-биму) означена 15-рочнїца його упокоєня. О Ґаднянскийови бешедовала директорка РКЦ Наташа Макаї Мудрох, а на тим омажу Миркови присуствовала и його мац Злата Ґаднянски.
На Фестивалє Дюра Папуґа вчера представел и найновше число глашнїку Рускей матки „Руснак”, а попри спомнутей Тиркайловей, о „Русин Филм Фест”, хтори початком октобра отримани у Шидзе, у орґанизациї Реґионалного одбору Рускей матки за Срим, бешедовал и Зденко Лазор.
Спомнути фестивал представени и з проєкцию документарного филму о вельким страданю Русинох на Горнїци у Першей шветовей войни „Траґедия Галицкей Руси”, русийского режисера Алексея Денисова, а приказани и кратши препатрункох филмох хтори участвовали на „Русин Филм Фесту”.