НОВИ САД – У орґанизациї Дружтва за руски язик, литературу и културу нєшка, 1. децмбра, починаю 25. Днї Миколи М. Кочиша, а програми манифестациї у вецей наших местох буду отримовани по 20. децембер.
Нєшка на 12 г. представителє орґанизатора манифестациї на гроби Миколи М. Кочиша и Меланиї Павлович на Городским теметове у Новим Садзе положа квеце, а на соботу 5. децембра, у Руским културним центре у Новим Садзе будзе отримана Скупштина Дружтва за руски язик, литературу и културу (Дружтво).
Идуци тидзень манифестация будзе у школох у Новим Садзе и Новим Орахове, та на парохиї у Бачинцох, а попри других змистох, плановани промоциї найновших виданьох Дружтва, воспитно-образовни активносци за нашо предшколски дзеци у Новим Садзе, та стретнуца з писательку Серафину Макаї у вецей наших школох.
Под час Дньох Миколи М. Кочиша буду представени кнїжки у продукциї Дружтва – Леони Лабош Гайдук „Штверо дїяче у култури зоз Шиду з презвиском Лабош”, Мирона Жироша „Америцки мен – правдиви приповедки о живоце Руснацох у Америки”, та Юлияна Папа „Стретнуца з прешлосци”. Ґу тому, будзе представена и фотомоноґрафия Дюру Лїкара „Миклошевци под сримским нєбом”.
Представянє кнїжкох плановане и у Руским Керестуре, а у рамикох манифестациї будзе додзелєне и припознанє „Проф. Гавриїл Г. Надь”.
Днї Миколи М. Кочиша у Календаре репрезентатвиних манифестацийох Руснацох Националного совиту, а попри Совиту, їх отримованє финансийно потримую и два покраїнски секретарияти – за културу и явне информованє и за образованє, предписаня, управу и национални меншини-заєднїци, та Город Нови Сад.