Почина Биєналє лемковскей култури

автор зам
1.2k Опатрене

КРИНЇЦА (ПОЛЬСКА) – У Кринїци, у Польскей нєшка, 27. мая, почина Дзевяти Биєнале лемковскей/русинскей култури, а тирва и ютре, 28. мая. Биєнале орґанизую Здруженє Лемкох Польскей, Шветова рада Русинох/Руснацох/Лемкох (ШР РРЛ) и Месни уряд Кринїца. Под час фестивалу будзе отримана и порядна схадзка ШР РРЛ.

На Биєналу у Кринїци участвує и делеґация Руске матки (РМ) Сербиї, чий предсидатель Дюра Папуґа и член ШР. Спред РМ до Кринїци вчера одпутовали спомнути Папуґа, заменїк предсидателя РМ и член Комисиї за културу Шветового конґресу РРЛ Миломир Шайтош, писателька и подпредсидателька Реґионалного одбору РМ за Срим Саня Тиркайло и член Месного одбору РМ Славко Пап.

Нєшкайша програма почнє з панахиду над гробом познатого лемковского уметнїка Епифана Дровняка Никифора и кладзеньом квеца на його памятнїк у Кринїци, а будзе отворена и вистава русинских авторох.

Нєшка будзе и перши концерт, на хторим участвую ансамбли з Польскей, Словацкей, Мадярскей и України, а на концерту будзе уручена и тогорочна Награда ШР „Василь Турок Гетеш”. На вечар наступи Театер Александра Духновича з Прешова, з представу „О двох ґенералох”, а потим будзе и литературна програма, на хторей зоз своїма творами участвує и Саня Тиркайло.

Под час Биєналу на ютре будзе отримана схадзка ШР РРЛ, а потим и наукови сход пошвецени русинскей култури. На тим сходзе члени РМ представя Медзинародни мултижанрови русински фестивал „Русин филм фест”, хтори ма буц отримани 1. и 2. октобра у Шидзе, а у рамикох културних активносцох Шветового конґресу РРЛ.

Дзевяти Биєнале лемковскей/русинскей култури на ютре будзе закончени з другим концертом, а як наявене, у врацаню з Кринїци делеґация РМ на нєдзелю нащиви и закончуюци програми на Штвартим Русинским фестивалє у Свиднїку, у Словацкей, на основи поволанки приматора Свиднїку Яна Голодняка.

ПОВЯЗАНИ ТЕКСТИ