КУЛА – Длуго наявйоване будованє витропарку у околїску Кули тих дньох почало, а плановане же би бул закончени у октобру, обявел ношитель проєкту, компания „МК Финтел Винд”. Витропарк будзе продуковац 27 милиони киловат-годзини ткв. „желєней енерґиї“, достаточней за подмирйованє коло 8 000 ґаздовствох, а за гражданох важни и податок же тота инвестиция обезпечи 50 нови роботни места.
Построєнє будзе мац три витроґенератори, високи 178 метери, а до проєкту уложени коло 15 милиони еври. Ношитель проєкту „Витропарк Кула“ – „МК Финтел Винд“ – у ствари резултат сотруднїцтва италиянского явного подприємства „Финтел Енерґиа Спа“ и „МК ґрупи“, у власнїцтве познатого сербского бизнисмена Миодраґа Костича.
– После вецей роки чеканя на нєобходни дозволи, задовольни зме же тота инвестиция будзе реализована у Сербиї – виявел у сообщеню вивершни директор компаниї „МК Финтел Винд“ Тицияно Дьованети.
Окрем у Кули, будованє витропарку наявене и у околїску Вершцу.