Почина Зонска смотра, Керестурци бавя на ютре

автор зам
1k Опатрене

ЧЕРВИНКА – У Червинки нєшка, 2. априла, почина 48. Зонска смотра аматерских театрох, на хторей того року у змагательней конкуренциї участвую штири представи  з кулскей и єдна з вербаскей општини.

Зонска смотра нєшка почнє з представу „Чудо у Шарґанє” Любомира Симовича, у режиї Радоя Чупича, а у виводзеню домашнїх – Театру „Стеван Сремац” Дому култури Червинка.

На ютре, 3. априла, на Зонскей смотри наступи Младежска ґрупа Драмского студия АРТ Дому култури Руски Керестур з представу Олександра Витера „Сезона лову на ловара”, у режиї Владимира Надя Ачима.

Смотра на пондзелок будзе предлужена з представу „Най жиє покойнїк” („Живијо покојник”) Слободана Елезовича, у режиї Радоя Раонича, а у виводзеню Аматерского театру „Владимир Попович” Културного центру Вербас. На вовторок наступя члени Драмскей секциї „Велимир Сандич Велько” Дому култури Сивец, з представу „Дзивка з трома оцами” Брану Црнчевича, у режиї Максима Мудринича, а змагательну часц законча аматере з Културного центру Кула, з представу Бранислава Нушича „Подозрива особа”, у режиї Драґана Остоїча.

Зонска смотра у Червинки будзе заварта на штварток, 7. априла, з госцуюцу представу „Урнебесна траґедия” Душана Ковачевича Театру „Раша Плаович” з Убу, у режиї Александра Тадича.

Селектор Смотри драматурґ Миливоє Младєнович зоз Зомбора, орґанизаторе Културно-просвитна заєднїца Општини Кула и Дом култури Червинка, а покровитель Општина Кула.

Шицки представи починаю на 20 годзин у сали Дому култури Червинка.

ПОВЯЗАНИ ТЕКСТИ