ШИД – На ютре, 4. децембра, з кладзеньом венцох и квеца на памятнїки погинутим борцом почнє означованє 72-рочнїци ошлєбодзеня Бикичу, Соту, Ердевику и Моловину, а на пондзелок, 5. децембра, будзе означене ошлєбодзенє Беркасова, Люби и Привиней Глави у Другей шветовей войни.
У Народней библиотеки „Симеон Пищевич“ нєшка, на ютре и на пондзелок буду отримани промоциї часопису за културу „Шидина“ и кнїжкох „Судьби” Миодраґа Миловановича и „Гражданство шидске“ Радована Сремца.
Централна манифестация з нагоди Дня ошлєбодзеня Шиду и Дня општини Шид будзе на вовторок, 6. децембра, а почнє на 11 г. зоз Шветочну схадзку Општинского одбору Союзу борцох народноошлєбодительней войни, а потим буду положени венци на спомин-костурнїцу погинутим борцом на городским теметове при „петокраки“, як и на спомин-плочу погинутим борцом на будинку Културно-образовного центру.
На вовторок у Руским доме на 12,30 г. будзе отворена вистава малюнкох УЛУС у Шидзе, а на 16 г. у сали Културно-образовного центру будзе Шветочна схадзка Скупштини општини Шид и Шветочна академия, на хторей ґлумица Весна Станкович виведзе монодраму „Милунка Савич“.