ПЕТРОВЦИ (ГОРВАТСКА) – Нєшка у Петровцох почина Централна манифестация култури Руснацох у Горватскей „Петровски дзвон” и тирва по 5. юний. Нєпоштредни орґанизаторе „Дзвону” Союз Русинох Републики Горватскей з Вуковару и КУД „Яким Гарди” з Петровцох.
„Петровски дзвон”, 43. по шоре, того року будзе отримани у знаку 185-рочнїци приселєня Руснацох до Петровцох и Горватскей, 180-рочнїци грекокатолїцкей парохиї у Петровцох и 45-рочнїци часопису „Нова думка”. Фестивал будзе отримани под покровительством Совиту за национални меншини Републики Горватскей и з финансийну потримовку Вуковарско-сримскей жупаниї.
Фестивал нєшка на вечар почнє у Етноґрафскей збирки з приказом обичаю рубаня майского древка, а у истим просторе на ютре, 4. юния, буду отворени три вистави – иконох о. Михайла Гардия з Метлики, зоз Словениї, древорезох Йовґена Сопку з Петровцох и сувенирох Михайла Панковича з Пишкуревцох.
На ютре будзе и промоция кнїжкох – Миколу Папа, Владимира Провчия и ґрупи авторох, а потим и Музично-литературни вечар руских писательох з Горватскей, пошвецени спомнутим ювилейом.
На нєдзелю, 5. юния, перше будзе манифестация дзецох „Петровски дзвончок”, а потим и смотра музично-фолклорней творчосци Руснацох у Горватскей и їх госцох „Петровски дзвон”.
Попри руских, на обидвох манифестацийох буду участвовац и ансамбли других меншинох, а на главней манифестациї предвидзени наступ и Женскей шпивацкей ґрупи, танєчней секциї ветеранох и оркестру КУД „Петро Кузмяк” з Нового Орахова.