КОЦУР – Нєшка у Коцуре почина преслава 70-рочнїци колонизациї Сербох з Босни и Герцеґовини до Коцура. Преслава тирва три днї и за тот час буду отримани вецей рижнородни змисти. Орґанизатор преслави Културно-уметнїцке дружтво „Завичајно врело” з Коцура.
Преслава нєшка почнє з Країшским вечаром, на хторим наступя Бая Мали Книнджа, Новица Текич и Ранко Станич Джими. Країшски вечар будзе у дворе Основней школи, а уход 500 динари.
На ютре, на соботу, програма почина на 17 годзин, кеди будзе дефиле, а на площи опрез Школи наступя фолклорни ансамбли. Ту будзе и змаганє у стародавних спортских бавискох.
На 18 годзин у физкултурней сали будзе отворени етно-стол, подобова вистава и вистава старих фотоґрафийох колонистох, та отримана промоция кнїжки „Длуство старому краю” („Дуг завичају”).
На 19,30 годзин у Доме култури будзе шветочна програма, на хторей, попри домашнїх дружтвох з Коцура – „Завичајно врело”, „ДОК” и „Жатва”, наступя и ансамбли КУД-ох з Ґайдобри, Кляїчева, Младенова, Вербасу, та и з Босней – з Двору на Уни и Враньскей.
На нєдзелю на 19 годзин у Доме култури будзе програма „Здогадованє на Бранка Чопича”, на хторей наступи и Дзецинска ґрупа КУД „Завичајно врело”, а потим ґлумец Ґоран Караїч одбави монодраму „Бог те мазо”, у режиї Томи Курузовича, а у продукциї Народного театру Шабац.