Почина Руски фестивал малих сценских формох „Дюра Папгаргаї”

автор зам
1k Опатрене

НОВИ САД – У Новим Садзе нєшка, 9. децембра, почина 14. Руски фестивал малих сценских формох „Дюра Папгаргаї”, хтори орґанизую Матка-Дружтво Руснацох Нового Саду-Войводини, Городски одбор Рускей матки Нови Сад и новосадски Руски културни центер (РКЦ). Фестивал тирва и на ютре, 10. децембра.

Фестивал того року будзе у просторийох РКЦ (Йована Суботича 8), а нєшка на 19 годзин почнє з омажом Миркови Ґаднянскийови з нагоди 15 рокох од його упокоєня. У рамикох Фестивалу нєшка будзе и промоция найновшого числа глашнїку Рускей матки „Руснак”, як и представянє першого Руского филмского фестивалу „Русин Филм Фест”. У рамикох презентациї Фестивалу будзе и проєкция документарного филму о вельким страданю Русинох на Горнїци у Першей шветовей войни.

На ютре, 10. децембра, тиж у РКЦ, на 19 г. будзе отворена вистава малюнкох Мариї-Маї Бесерминї и Гелени Сивч, а потим виводзени два монодрами – „Шветочни Крачунски сукнї” („Свечане Божичне хаљине”) автора Радомира Мильойковича, котри источашнє и ґлумец и режисер своєй монодрами, та „Пес мой найлєпши приятель” Владимира Кочиша, котри тиж ґлумец и режисер тей монодрами. Кочишова монодрама витворена у продукциї Драмского студия дакедишнього РКДП Нови Сад.

Отримованє Фестивалу финансийно потримали Городска управа за културу Нови Сад и Национални совит Руснацох.

ПОВЯЗАНИ ТЕКСТИ