РУСКИ КЕРЕСТУР – Тих дньох почнє обиванє и малтерованє Катедралней церкви у Руским Керестуре, билєнє турнї, як и одредзени роботи у олтаре церкви, дознава Рутенпрес од керестурского пароха о. Михайла Малацка. Пре тото од нєшка, та по нєдзелю, ранши и вечарши Служби Божо буду у каплїци у Старим манастире на Капущаним шоре, а за далєй будзе познєйше оглашене.
У олатаре будзе премосцена електрична инсталация, пременєти рефлектори у олтаре и на иконостасу, олтарска часц будзе омалтерована и врацени реставровани икони найдзени за ламперию на муре.
За роботи на турнї пенєж обезпечени з вецей жридлох – 400 000 динари з Канцелариї за одношеня з церквами и вирскима заєднїцами при Министерстве правди, прейґ конкурованя, а значна сума назберана и як донациї од прейґ 100 фамелийох.
Роботи у олтаре буду финансовани з донациї єдней даровательки, котра за тоту намену, по шмерци, як тал зохабела два гольти жеми.
Шицки роботи будзе орґанизовац подприємство „Изґлед” з Руского Керестура, власнїка Йоакима Чизмара.