БЕОҐРАД – Представителє Министерства просвити 6. септембра отримали роботну схадзку з представителями Координациї националних совитох (НС-ох) националних меншинох у Сербиї на хторей бешедоване о пошвидшованю процедури одоброваня учебнїкох на язикох меншинох и даваня согласносцох за отверанє оддзелєньох з меншим числом школярох котри ше школую на мацеринским язику. Схадзка отримана на инициятиву Координациї НС-ох, а на предкладанє Националного совиту Горватох.
Як поведзене, НС-и векшином сполнєли дати термини за придаванє учебнїкох, алє одоброванє авторских учебнїкох за нїзши класи ОШ пожнї пре нєдавне формованє новей Влади, а як и учебнїки за висши класи ОШ, уж су мешац у процедури одоброваня, алє го ище нєт. Представителє Министерства обецали же тота процедура тераз будзе вельо швидша, а у Войводини одобренє за учебнїки од тераз будзе давац Педаґоґойни завод Войводини.
Кед слово о учебнїкох на язикох меншинох за штредньошколцох, начално порадзене же о нїх будзе слова концом того рока, док буду закончени шицки роботи вязани за учебнїки за основношколцох.
Бешедуюци о проблему даваня согласносцох за роботу оддзелєньох з меншим числом школярох як 15, на схадзки поведзене же Министерство просвити о тим отримало схадзку з руководителями школских управох и вони маю спатриц стан у своїх штредкох и дац ришеня.
У мено Координациї НС-ох на схадзки присуствовали члени єй Роботна ґрупи Дарко Сарич Лукендич, Анико Єнас, Есад Джуджо, Витомир Михайлович и Светлана Золнян, спред Министерства просвити державна секретарка Ґордана Предич, та Ясминка Перуничич Ален и Мирослава Петров, як и Романца Йованович спред Заводу за видаванє учебнїкох.