НОВИ САД – Пре барз подли стан у здравстве у Войводини, по ребаланс буджету АПВ пенєж будзе приоритетно унапрямени за набавку и оправянє медицинскей опреми хтора найпотребнєйша у реґионалних шпитальох и Клїнїчним центре Войводини, як цо то ЦТ-апарати, маґнетни резонанци, анґио сала и друге, сообщела Покраїнска влада.
Покраїнска влада стреду, 6. юлия, розришела длужносци директора Институту за хороти плюцох проф. др Бранислава Перина и директора Институту за онколоґию проф. Милоша Лучича, пре, як поведзене – „заблуду явносци же почина лїченє у новим будинку Каменїца 2, за потреби политичней кампанї, а нє бул окончени анї технїчни приєм обєкту”.
За окончователя длужносци директора (о.д.) Институту за хороти плюцох меновани проф. др сци.мед. Илия Андриєвич, а за о.д. Институту за онколоґию проф. др Зоран Радованович.
На инициятиву предсидателя Покраїнскей влади Иґора Мировича, на схадзки утвердзени и Нарис покраїнскей скупштинскей одлуки о випатрунку и хаснованю символох и традицийних симболох АП Войводини, хтори будзе прешлїдзени до Одбору за питаня уставно-правного положеня АПВ, а потим на розпатранє и до Скупштини Войводини.
