По три ґоли на змаганьох

автор апал
1.3k Опатрене

На половки зме фодбалскей сезони. Фодбалере и клубски штаби на заслуженим одпочивку, алє уж ше почина правиц плани за предлуженє першенства у єшеньскей часци. Тих дньох почню и пририхтованя. Обща оцена посцигнутих резултатох – же нашо клуби у своїх лиґох витворели заплановане.

Дюрдьовски ФК „Бачка 1923” на першим месце у Медзиопштинскей фодбалскей лиґи Вербас–Титель–Жабель. У истей лиґи  потим шїдзи коцурски ФК „Искра” хтора на другим месце. Керестурски ФК „Русин”, як и плановал, у штредку таблїчки, завжал седме место.

ИСТИ ЦИЛЬ И У ВИСШИМ РАНҐУ

Дюрдьовска Бачка у своїм остатнїм першенственим змаганю освоєла три боди, односно победзела Обилич зоз Змаєва зоз 3:0. У лиґи було 11 клуби од хторих найвекши ривал и найзначнєйши процивнїк Дюрдьовчаньом були фодбалере коцурскей Искри.

Ґоран Андєлкович

Ґоран Андєлкович

– У тей часци першенства Бачка одбавела двацец змаганя. Єдно зме бавели нєришено и єдно зме страцели, а шицки други зме победзели. Дали зме 54 ґоли, а прияли 12, цо значи же зме у плус скору од 42 ґоли. На концу зме освоєли перше место зоз 55 боди. Од єшенї преходзиме до висшого ранґу змаганя, до Подручней фодбалскей лиґи Нови Сад. То значи же зме тераз по ранґу у истей лиґи як цо бул и ФК Русин зоз Рускоґо Керестура лєм же вони у другим подручу – гварел Ґоран Андєлкович тренер ФК  „Бачка 1923”.

Змаганя у новим, висшим, дружтве, Подручней фодбалскей лиґи Нови Сад, починаю штредком авґуста. Штаб Бачкей очекую велї спокуси, чежши змаганя и вельо закладня бавячох.

– Свидоми зме шицкого цо нас чека у предлуженю першенства. Мушим надпомнуц же посцигнути успих витворела подмладзена екипа. До початку першенства очекуєме же ше до Клубу враца 4–5 старши бавяче хтори єден час бавели у других клубох, та и иножемстве. То нам дава витор до хрибта и очекуєм же тим предлужи  успишни и добри змаганя. Нє тактизуєме вельо, бавиме же бизме победзели. Же би нам ше то и удало уж тих дньох починаме зоз пририхтованями хтори буду ту у Дюрдьове – ґварел Ґоран Андєлкович.

УСПИХ ПРЕЗ СТАТИСТИКУ

ФК Бачка 1923 одбавела двацец змаганя. Єдно бавели нєришено и едно  страцели, а шицки други победзели. Дали 54 ґоли, а прияли 12, цо значи же скор у плус  42 ґоли. На таблїчки су на першим месце зоз 55 бодами. ФК Искра зоз Коцура посцигла за ниянсу слабши резултат од того хтори призначели Дюрдьовчанє. Од двацец змаганьох, Коцурци победзели на седемнац, два бавели нєришено и єдно страцели. На змаганьох дали 60, а приялли двацец ґоли, та им скор 40 ґоли у плусу. ФК Русин победзел на тринац змаганьох, нєришено бавел шейсц, а страцел єденац. Бавяче Русина дали 46 ґоли, а прияли 52. Скор им неґативни за шейсц ґоли. Статитстично поздаване виходзи же на змаганьох дати вецей як три ґоли.

ЗА НИЯНСУ СЛАБШИ КОЦУРЦИ

 У истей лиґи змагал ше и ФК „Искра” зоз Коцура. Посцигнути резултат за ниянсу слабши од гевтого хтори призначели Дюрдьовчанє.  Од двацец змаганьох, Коцурци победзели на седемнац, два бавели нєришено и єдно страцели. На змаганьох дали 60, а приялли двацец ґоли, та им скор 40 ґоли у плусу. Статистично спатрене, навияче по каждим змаганю могли видзиц по штири ґоли. То указує же змагня були добри и же ше бавяче на терену закладали и борели.

Златко Колєсар

Златко Колєсар

– Прешлого лєта руководство Искри оформело екипу котра би без проблемох требала сезону закончиц на першим месце и пласовац ше до Подручней лиґи. Лєтнї пририхтованя указали же Искра була на добрей драги же би тот циль и витворела. Победзели зме екипи котри ше змагаю у висших лиґох, а коруна була и перше место на турниру у вельким фодбалу котри у авґусту отримани у рамикох СБ „Яша Баков”. Медзитим, у другим колу змаганя Коцурци направели перши кикс кед зме страцели у Радичевичу, од реално вельо слабшей екипи котру зме у другей часци сезони у Коцуре победзели аж зоз 5:0. Найвекши, и як ше познєйше випоставело и єдини конкурент за перше место Искри була екипа Бачкей зоз Дюрдьова. Бачка потвердзела же ше першенства освоюю на „малих змаганьох”. За розлику од Искри, Дюрдьовчанє  на шицких тих змаганьох победзели, а Искра ше окрем у Радичевичу „пошлїсла” и у Савиним Селу дзе зоз скромну екипу Будучносци одбавела нєришено 1:1. У медзисобним змаганю, Искра була лєпша од Бачки, у Коцуре победзела аж зоз 4:1, а у Дюрдьове було 0:0. Фодбалером Бачки то єдини два змаганя на котрих нє победзели, алє на концу сезони мали два боди вецей на таблїчки од Искри – гварел Златко Колєсар, стандардни першотимец у ФК „Искра”.

Нєсполнєни циль – пласовац ше до Подручней лиґи, вироятно принєше и пременки у руководстве Искри, а можлїве и у бавяцким кадру фодбалскей екипи Искра. За тераз ище нєпознате же кеди почню пририхтованя и чи будзе пременки у бавяцким кадру, алє и чи тренер Здравко Бабич и у шлїдуюцей сезони будзе на чолє екипи. На шицки тоти питаня одвити ше достанє у наиходзацих дньох на схадзки руководства клуба. Од шлїдуюцей сезони пре реорґанизацию, Искра идзе до Суботицкого реґиону змаганя.

ФОДБАЛЕРЕ РУСИНА СПОЛНЄЛИ ЗАДАТОК

У остатнїм колє ПФЛ Зомбор Русин бавел найчежше змаганє тей яри. Процивнїк му бул Полет зоз Каравукова, екипа котра прешвечлїво перша на таблїчки, и котра тей яри страцела лєм єдно змаганє у Свилоєву под досц подозривима условиями. Фодбалере Русина були лєпши на тим змаганю, нєпреривно мали инициятиву, а госци углавним бавели на контри. На тим змаґаню Русиновци указали добре бависко, голєм за нєришени резултат. Нажаль, Полет победзел зоз 2 1.

ФК „Русин” у ярнєй часци першенства бавел трицец змаганя. Победзел на тринац, нєришено бавел шейсц, а страцел єденац. Бавяче Русина дали 46 ґоли, а прияли 52. Скор им неґативни за шейсц ґоли.

Борис Шайтош

Борис Шайтош

– Фодбалски клуб „Русин” на концу першенства завжал седме место у Подручней фодбалскей лиги Зомбор цо бул и план – буц медзи перши 8 екипи. Наявена була реорґанизацийа лиґи цо ше и случело. Злучели ше Подручна фодбалска лиґа Зомбор и Бачка Паланка. Перша екипа у ПФЛ Зомбор (ФК Полет) пласовала се до Бачкей лиги,  а екипи од другого по осме место вошли до тей новей реорґанизованей лиґи. Зомборска подруче до новей лиґи дава дзешец екипи, а Бачка Паланка шейсц. Окрем екипох зоз Подручней лиги Зомбор (БСК, Липар, Младосц, Шикара, Борац, Тереквеш, Русин) до того ранґу зоз Општинскей лиґи вошол Гайдук Юниор зоз Кули, а зоз Бачкей лиги випадли Сивец и ЖАК, котри тиж так буду бавиц у тей лиґи – гварел Борис Шайтош, секретар ФК „Русин”.

З другима словами, Русиновци сполнєли задаток, буц у штредку таблїчки, цо им обезпечело уход до реорґанизованей лиґи. Од єшеньскей часци першенства у новей лиґи мож очековац и лєпши змаганя.

– Екипи хтори до новей лиґи уходза зоз подруча Бачкей Паланки – Стари Ґрад, Кридла Країни, Бачки Петровец, Ґайдобра, Младеново и Пиньвиц окрем уж спомнутих зоз зомборского подруча, обецую лєпши квалитет. Думам же Русин може буц задовольни прето же уход до тей лиґи значи же ше напредовало. Спод тей лиґи єст ище два лиґи, а Русин потераз бавел у предостатнєй. Пририхтованя починаме 10. юлия. Тренер и далєй будзе Златко Саянкович, а пробуєме до екипи врациц Бояна Бранковича хтори бавел за екипу ФК „Задруґар” зоз Сербского Милетичу. Нашу екипу, затераз, змоцнєл бавяч зоз Червинки, Кончар   – наглашел Борис Шайтош.

Кед ше шицко поздава, мож повесц же з успихом наших клубох у ярнєй часци першенства, можеме буц задовольни. Клуби сполнєли плани, управи клубох тиж задовольни, а тиж так и навияче. Насампредз же на каждим змаганю дати найменєй три ґоли. Очекуєме таку и єшень.

РЕОРҐАНИЗАЦИЯ ЛИҐИ

Пременки пре реорґанизацию лиґох будзе и у лиґи у котрей ше у шлїдуюцей сезони будзе змагац и Искра зоз Коцура. Место у потерашнєй Медзиопштинскей лиґи Вербас–Титель–Жабель, Искра на єшень будзе бавиц у Медзиопштинскей лиґи Бачка Тополя–Мали Идьош–Вербас–Бечей.

Окрем Искри у новоформираней лиґи ше буду змагац и екипи:

ФК „Младосц” (Радичевич); ФК „Єдинство” (Бачке Петрово Село); ФК „Войводина” (Бачке Ґрадиште); ФК „Младосц Радосц” (Србобран); ФК „Будучносц” (Савине Село); ФК „Побида” (Побида); ФК „Нєґош Б” (Ловченац); ФК „Бачка Б” (Пачир); ФК „Шлєбода ”(Стара Моравица); ФК „Томиславци” (Томиславци); ФК „Едєшеґ” (Мали Идьош) и ФК „Обилич” (Змаєво).

ПОВЯЗАНИ ТЕКСТИ