БЕОҐРАД – З першу схадзку Роботней ґрупи у Палати Сербия вчера почал виробок Акцийного плану за витворйованє правох националних меншинох, хтори барз важни за прегваряцке поглавє 23 у приступних прегваркох з Европску унию.
Циль же би ше подполно применєло постояци предписаня у порядней пракси – од державних по локални орґани.
Совит Европи и Европска комисия оценєли же закони и предписаня з тей обласци барз квалитетни, алє препоручели унапредзенє їх запровадзованя.
Сербия дотераз прилапела вецей афирмативни закони хтори ушорюю меншински права, а ма и специфичносц яка нє постої нїґдзе у Европи – же национални совити националних меншинох орґанизовани на централним уровню, гварел державни секретар Министерства державней управи и локалней самоуправи и член Роботней ґрупи Иван Бошняк.
На конститутивней схадзки Роботней ґрупи присуствовали и представителє компетентних министерствох, представителє националних совитох (НС) меншинох, нєвладового сектору, експерти Совиту Европи (СЕ), як и шефица Прегваряцкого тиму Сербиї Таня Мищевич.
У складзе зоз заключеньом пред тим отриманей Координациї националних совитох, на схадзки предложене же би до Роботного цела за виробок Акцийного плану вошла и предшедуююца Координациї НС Ана Томанова Маканова и представителє националних совитох Албанцох и Ромох.
Як поведзене на схадзки, основа за виробок Акцийного плану за витворйованє правох националних меншинох за прегваряцке поглавє 23 будзе Треце думанє Совитодавного цела Комитету СЕ за Сербию з новембра 2013. року.