Права трошительох нєдосц познати

автор блиц/сен
841 Опатрене

СЕРБИЯ – Трошителє у Сербиї маю велї права за хтори нє знаю, та часто одуставаю од рекламацийох на купени продукт. Процивно думаню векшини, купец ма право дац рекламацию и кед нє ма фискални рахунок, понеже тарґовец три роки муши чувац копию з фискалней каси.

Право на оправку и замену роби трошитель ма два роки, гоч нє ма ґаранцию. Кед особа куповала прейґ интернету, ма право 14 днї же би ше предумала, а тарґовец муши доручиц робу за найвецей 30 днї.

Ґоран Попович з Националней орґанизациї трошительох Сербиї гварел же мало людзе знаю же, кед му тарґовец на каси наплаци векшу цену од гевтей яка пише на полїчки, трошитель ма право вимагац же би ше му наплацело по туньшей цени.

Кед роба нє ма квалитет яки приказани, тарґовец муши понукнуц замену, а трошитель може питац пенєжи назад.

Вецей о своїх правох трошителє можу дознац на сайту Националней орґанизациї трошительох Сербиї – www.nops.org.rs

ПОВЯЗАНИ ТЕКСТИ