Прави ше дзецинску лиґу

автор З. Колєсар
1.4k Опатрене

Од снованя Голубарского клубу у Коцуре, под назву Здруженє виховательох голубох сербских високолєтачох ҐСС 699, „Сербски шарканї” у фебруару вше отримовали Рочну скупштину. Того року єй нє будзе, пре чежку финансийну ситуацию.

У прешлим року число членох у голубарским клубу „Сербски Шарканї” ше зменьовало, а тераз Клуб ма 18 активни члени од котрих шесцеро дзеци.

Viktor Gresak, predsidatelj holubarskoho klubuПредсидатель Клубу Виктор Ґрешак гварел же на нєдавно отриманей схадзки одлучене же за шицких членох Клубу  членарина будзе безплатна, як и за будуцих членох котри заинтересовани учленїц ше до Клубу. Домашнї у Клубу порихтани помогнуц новим членом зоз совитами и голубами.

– Приключели ше ґу нам дзеци прешлого року, то ми окреме мило, алє ми порихтани прияц и старших членох. Гоч финансийна ситуация у клубу чежка и нє було можлївосци направиц Скупштину и Голубарски бал як прешлих рокох, ми нє одуставаме од своїх идейох же прешириме и популаризуєме голубарство у Коцуре –  гварел Ґрешак.

На уровню општини и реґиону пришло ше на идею направиц дзецинску лиґу голубарох и за дзеци правилнїк о змаганю будзе благши и шицки искусни голубаре порихтани помогнуц будуцим голубаром.

– Кельо сом упознати зоз ситуацию у Коцуре, знам же дзеци тримаю голуби на чардакох, алє нїяк нє можеме дойсц до нїх, учлeнїц их до Клубу, и научиц их правилно пририхтац, тренирац и пущац голуби, та прето хаснуєм тоту нагоду и поволуєм шицких заинтересованих родичох же би приведли свойо дзеци до нашого Kлубу, або же би ше мнє явели на телефон. Ми би им и подаровали голуби, научели их як их правилно тримац и як ше треба справовац на змаганю же би Коцурци мали свою дзецинску лиґу голубарох, алє и же би голубарство було популарнєйше – заключел Ґрешак.

Сезона у голубарстве почина 1. мая и тирва до 30. септембра, а змаганя на клубским уровню заказую ше кед голуби порихтани, а кажди клуб муши виполнїц квоту од 5 пущаня голубох на рочним уровню.

Заинтересовани за учлeньованє до голубарского клубу можу ше явиц предсидательови Клуба Викторови Ґрешакови на число телефона 064/186 10 38.

DSC_0177

ГЛАШНЇКИ БОГОХ

Голуби (латинска назва Columbidae) то птици хторих єст 308 файти. Жию на цалим швеце, а найвецей файти голуби єст у Индонезиї и Австралиї.

Науковци твердза же су припитомени ище 3 000 роки пред нову еру. Предпоставя ше же их припитомели Єгиптянє и Сумери. Тоти народи почитовали голуби як святи птици, як божих глашнїкох. У єгипетских, фараонских криптох археолоґове пренашли мумификовани голуби хтори требали фараоном хасновац як глашнїки на драги до нєба.

Зоз старого Єгипту пестованє голубох ширело ше и на други цивилизациї. Познате же ище Греки и Римянє пестовали голуби. Теди ше почали формовац рижни файти. У штреднїм вику лєм племство шмело пестовац голуби.

Голуби дзелїме на два основни ґрупи – спортски голуби, т.є. гевти хтори маю позарядово прикмети лєценя, и голуби хтори ше пестує пре красу.

ПОВЯЗАНИ ТЕКСТИ