НОВИ САД – Гоч у Сербиї Устав и закони ґарантую националним меншином хаснованє свойого язика и писма у державних, покраїнских и локалних орґанох, институцийох и установох, указало ше же тоти права нє вше витворлїви – резултат виглєдованя хтори окончел Национални совит Мадярох.
Виглєдованє з назву „Язична полиция” тирвало вецей як дзешец мешаци, под час хторих двоме леґинє документовали шицки факти у вязи зоз службеним хаснованьом язика и писма. За тот час нащивели 31 локалну самоуправу, односно 240 населєня и дошли до велїх прикладох же ше нє почитує право мадярскей националней меншини на хаснованє язика и писма.
Як за мадярски новини „Мадяр со” гварел єден з виглєдовачох, у местох дзе векшина жительства Мадяре могли шицко покончиц по мадярски, алє у местох дзе су у меншини, то було чежко, або анї нє могло покончиц.