РУСКИ КЕРЕСТУР – Совит керестурскей Месней заєднїци (МЗ) на вчерайшей схадзки предложел вецей роботи хтори би, як то по нових законских предписаньох од идуцого року, мали войсц до заєднїцкого буджету и проєктох Општини Кула, як и проєктох компетентних явних комуналних подприємствох, а хтори буду финансовани з валалского месного самодоприносу.
Ровнаюци ше спрам Програми месного самодоприносу, у ставки за отримованє и оправянє постояцих обєктох МЗ предклада же би ше у 2015. року здружело средства за оправянє закрица на часци здравственей амбуланти, инвестовало до оправяня дзецинского парку, до поставяня ошвиценя у улїцох дзе нєдостава, та до предлуженя асфалтованя Червинскей драги за километер.
Тиж так, предложене же би ше отримовало ярки и банкини по валалє, оправело фонтану у парку у центре, оправело нукашньосц базену, поставело надпатраюци камери на уходох до Керестура и у центре валалу, та ушорело салу за винчанє у Старей школи. За предлоги спомнутих проєктох би мали буц виробени и предрахунки, а понеже МЗ вецей нє може сама розписовац явни набвки, проєкти би мали буц витворени на основи здружованя средствох з явнима комуналнима подприємствами и компетентнима установами.
Пенєж зоз самодоприносу, як и до тераз, будзе унапрямени и на дотациї за образованє, културу и спорт и нєвладовим орґанизацийом, тиж и за Фонд солидарносци, алє здруженя за тоти средства до Месней заєднїци буду мушиц конкуровац з проєктами.