НОВИ САД – Гоч буджет Покраїнского секретарияту за спорт и младеж того року 60 одсто менши у одношеню на прешлорочни, ресорна секретарка Мариника Тепич вовторок наявела же и того року буду потримовац младих спортистох и младежски проєкти.
– Тераз зме розписали два цалорочни конкурси з обласци спорту, чия вредносц 143 милиони динари, а за конкурс младежского сектору обезпечени 22,5 милиони динари – гварела Тепичова.
З тей нагоди наявела же у фебруаре буду розписани конкурси за орґанизацию медзинародних спортских манифестацийох од значеня за Войводину, за цо опредзелєни 10 милиони динари, конкурс за афирмацию женох у спорту, за цо наменєни 2 милони динари и конкурс за санацию, адаптацию и набавку опреми за младежски орґанизациї, орґанизациї за младих, младежски доми и доми култури.
– Жадам визначиц же, и попри зменшаня буджету, и того року будземе давац стипендиї нашим наймладшим спортистом, юниором и кадетом, так же того року прейґ покраїнских фахових союзох буду вибрани 50-еро, як и 10-еро млади и перспективни тренере – гварела Тепичова.