Представени перши том позбераних творох Звонимира Нярадия

автор ажи; фото: вев
1.5k Опатрене

НОВИ САД – Позберани писнї Звонимира Нярадия „Капка ми ружа до ока” („Обшеднути зоз цинями”) у виданю НВУ „Руске слово” перши раз представени вчера, 14. априла, на Салонє кнїжкох у Новим Садзе на штанду Покраїнского секретарияту за образованє, предписаня, управу и национални меншини-национални заєднїци.

О першим тому позбераних дїлох Звонимира Нярадия бшедовал редактор Видавательней дїялносци „Руского” Микола Шанта, котри потолковал же є найрепрезентативнєйши бо и сам автор на одредзени способ участвовал у контурованю кнїжки, понеже Видавательна дїялносц достала Нярадийово рукописи. Даєдни уж були поскладани до цалосцох хтори и обявени у новей кнїжки „Капка ми ружа до ока” („Обшеднути зоз цинями”).

– Кед зме предуркали шицок материял, видзели зме же у питаню вецей як 1 000 боки поезиї. Мушим визначиц же шицки до компютера унєсол Ваня Дула, котри вєдно з Юлияном Тамашом и рецензент виданя, так же Видавательна дїялносц тераз ма шицки дїла Звонимира Нярадия и у електронскей форми. Видруковани лєм перши том, бо єст материялу за ище голєм два томи поезиї и єден прози, а наздавам ше же их и видаме – гварел вчера Шанта.

На представяню виданьох НВУ „Руске слово” на Салонє кнїжкох на Новосадском  сайме визначени и кнїжки „Нєбо керестурске” Ирини Гарди Ковачевич и перше електронске виданє часопису „Шветлосц”, а Оленка Планчак Сакач представела ище два твори хторим бла рецензентка – „Гришка” Асї Папуґа и „Вселенска чекркотка” Миколу Шанти.

ПОВЯЗАНИ ТЕКСТИ