ВЕРБАС – Пияток, 14. октобра, у Велькей сали Скупштини општини Вербас отримана промоция и явна розправа о проєкту чисценя Велького бачкого беґелю (ВББ), за хтори студию виробели Департман за хемию и защиту животного штредку Природно-математичного факултету, Републични гидрометеоролоґийни завод и ЯВП „Води Войводини”. Проєкт презентовал проф. др Божо Далмация зоз спомнутого факултету, а промоцию орґанизовали Општина Вербас и вербаски Еколоґийни рух.
Медзи численима жителями Вербасу, на промоциї були и подпредсидатель Општини Вербас Ненад Велицки и член Општинскей ради Душко Чутило, представителє Министерства польопривреди и защити животного штредку, Инспекциї за защиту животного штредку и ЯВП „Води Войводини”.
Професор Далмация у презентациї анализовал состав ВББ и визначел же з нього треба виняц коло 400 000 кубни метери седименту, з чого коло 178 000 муши буц одкладане на специялни депониї.
Попри виношеня проблему, проф. Далмация понукнул и вецей ришеня за чисценє беґелю и безпечне одкладанє одпаду, а же би то нє уплївовало на животни штредок. З понукнутих ришеньох видвоєл найтуньши и визначел же би цалосни трошки чисценя беґелю виношели од 4,5 до 6 милиони еври, цо вельо менєй од виносу хтори скорей бул у опциї.
Гоч би ше беґель з наведзенима средствами могло очисциц релативно швидко, за єдну будовательну сезону, заш лєм єст вецей препреченя хтори гамую конкурованє до европских фондох, же би ше достало средства за тоту намену. Першенствено, муши ше вибрац локациї за одкладанє седименту, а проєкт нє годно реализовац покля нє будзе докончене Централне построєнє за пречисцованє одрутних водох, чия вибудов при концу.
Понеже реализация спомнутого проєкту ище релативно далєко, гражданє ше на явней розправи питали же як заґадзени беґель уплївує на їх здравє, та хто за тото одвичательни, и вимагали же би ше депониї седименту находзели цо далєй од населєня.
Тиж так, було бешеди и о подприємствох хтори ище вше випущую одрутни води до ВББ, медзи хторима визначена Фабрика олєю „Витал”.