ШИД – У Руским доме всоботу, 27. фебруара отримана промоция роману „Ирина” писательки и поетеси Санї Тиркайло зоз Шиду. Роман написани по сербски, а видали го Културно-образовни центер и Сербски литературни клуб „Милош Црнянски” зоз Шиду.
Резензентка роману Ирина Гарди Ковачевич гварела же авторка спатрела одношеня людзох у мултинационалним штредку през любовну приповедку и дала печац єдного часу, односно перших 50 рокох 20. вику. Гарди Ковачевичова на промоциї препоручела же би роман бул преложени на руски язик.
О роману „Ирина” надихнуто бешедовал и поета и член Сербского литературного клубу „Милош Црнянски” Срдян Малешевич, котри гварел же после поетских, ушлїдзело и Саньово значне прозне дїло, хторе вон наволал „кнїжка-памятнїк” и у мено Шидянох на тим подзековал Тиркайловей.
Под час промоциї на бим-платну приказовани фотоґрафиї з прешлосци, з венчиком руских шпиванкох на програми участвовала Младша шпивацка ґрупа Културно-просвитного дружтва „Дюра Киш”, а малярка Андєлка Античевич з Беркасова у Руским доме виложела свойо малюнки.
Виривки з роману, як сценски прикази, читали ґлумци Аматерского театру „Бранислав Нушич” зоз Шиду, як и члени Клубу „Милош Црнянски” Петра Бошняк, Срдян Малешвич, Душан Теодорович и Зденко Лазор, а промоцию з музику и шпиванку збогацела и Бояна Вуцоня.
Саня Тиркайло подзековала шицким котри пририхтали и пришли на промоцию, а потим нащивительом, котри цалком виполнєли салу Руского дому, подписовала прикладнїки роману.
