НОВИ САД – Витворйованє мирох з Акцийного плану обезпечованя роботи за 2015. рок у Новим Садзе почало з розписованьом двох конкурсох – за самообезпечованє роботи и субвенциї за отверанє нових роботних местох. Окрем тих двох, того року заплановане и витворйованє фахових праксох, та мири з хторима ше потрима розвой польопривреди.
– Того року ше унапрямуєме на нових поднїмательох у малих бизнисох. Субвенция за самообезпечованє роботи виноши найвецей 300 000 динари, а обчекуєме же з тоту миру помогнєме коло 50 особом же би порушали свой бизнис, виявел стреду, 17. марца, городоначалнїк Нового Саду Милош Вучевич на представяню мирох потримовки за обезпечованє роботи у Городскей хижи.
За мотивованє привреднїкох же би отверали нови роботни места опредзелєни 200 000 динари по отвореним роботним месце. Програма Универзитетскей професийней пракси за студентох закончуюцих рокох оможлїви 50 студентом же би ше фахово усовершовали, а Город того року перши раз видвої пенєж за обуку женох котри би ше занїмали з поднїмательством
Член Городскей ради за привреду Ґоран Сечуйски наявел мири за потримовку розвою польопривреди и визначел же того року Город Нови Сад порихтал мири кредитней потримовки, односно директни даваня вредни 7 милиони динари.