СУБОТИЦА – Вчера, 20. марца, у орґанизациї Дружтва Руснацох у Суботици успишно отримана традицийна Културна манифестация „Яр Мафтея Виная”. Манифестация отримана у просторийох Єврейскей општини, а у мено домашнїх госцох привитали секретар Єврейске општини Роберт Ковач и предситатель Дружтва Руснацох у Суботици Иван Гарди.
Програма була составена з двох часцох, дзе у першей наступел Хор „Гармония” з Нового Саду, а у другей представена кнїжка „Народне облєчиво бачванско-сримских Руснацох и танци бачванско-сримских Руснацох”, у виданю Заводу за културу войводянских Руснацох.
З Хором „Гармония” присутних упознал його директор Борис Сакач, а потим присутни мали нагоду уживац у прекрасним виводзеню руских и українских шпиванкох того хору, под дириґентством Весни Кесич Крсманович.
Директор Заводу за културу войводянских Руснацох Серґей Тамаш спомнуту кнїжку представел по сербски, понеже у публики було и досц госцох котри нє Руснаци, а потим о кнїжки по руски бешедовал заменїк предсидателя Националного совиту Руснацох Йовґен Мудри.
Визначена значносц того капиталного дїла за Руснацох, на чиїм пририхтованю ше робело три роки, а прикладнїк кнїжки Тамаш подаровал и Дружтву Руснацох. Под час програми пририхтана и менша вистава кнїжкох наших видавательох.
Пред Манифестацию, пияток, 18. марца, представителє Дружтва Руснацох у Суботици и дзивка Мафтея Виная Татяна Таґасович вєдно нащивели Винайов гроб и положели квеце.
