БРИСЕЛ – Представителє националних меншинох зоз Сербиї вчера у Европским парламенту у Бриселу бешедовали о отвераню Поглавля 23 у приступних прегваркох за уход Сербиї до Европскей униї, хторе ше одноши на людски и меншински права. Схадзка отримана под покровительством европосланїка Едуарда Кукана, предсидателя делеґациї у Парламентарним одборе за стабилизацию и придружованє Сербиї ґу Европскей униї.
Пред отвераньом Поглавя 23, хторе ше одноши на людски и меншински права, у Европским парламенту отримани Округли стол о правох националних мешинох, на хторим присуствовали представнїки 8 националних мешинох зоз Сербиї.
Представителє меншинох з подпредсидательом Европскей комисиї за приступ Сербиї до Европскей униї Жаном Маринескуом, звитодавцом Европскей униї за приступ Сербиї до Европскей униї Давидом Мекалистером и амбасадором Сербиї при Европскей униї Душком Лопандичом, бешедовали о правох националних меншинох у Сербиї.
Мекалистер привитал прилапйованє Закона о националних совитох, хтори предвидзує унапредзованє правох националних меншинох. З округлого столу будзе принєшена и заєднїцка декларация о вчерайшим сходзе.